1 ოქტომბერს სასტუმრო "შერატონ მეტეხი პალასში“ „ღია მმართველობის პარტნიორობის“ ფარგლებში მრგვალი მაგიდა გაიმართა. ღონისძიებას ესწრებოდნენ იუსტიციის მინისტრის მოადგილე ალექსანდრე ბარამიძე, სახელმწიფო უწყებებისა და არასამთავრობო ორგანიზაციების წარმომადგენლები.

სამუშაო შეხვედრა მისასალმებელი სიტყვით იუსტიციის მინისტრის მოადგილემ და დემოკრატიული მმართველობის პროგრამის დირექტორმა მარის მიკელსონმა გახსნეს.

„ღია მმართველობის პროგრამა ბრაზილიისა და აშშ-ის პრეზიდენტების მიერ არის ინიცირებული. მისი მიზანია, საერთაშორისო დონეზე უზრუნველყოს ხელისუფლებების გამჭვირვალობა, ანგარიშვალდებულება და ეფექტიანობა. საქართველო ამ ინიციატივას 2011 წელს შეუერთდა. 2012-2013 წლების სამოქმედო გეგმაც ამავე წელს დამტკიცდა. დღევანდელ შეხვედრაზე სხვადასხვა სახელმწიფო უწყებამ, სამოქალაქო სექტორის მონაწილეობით, ერთმანეთს გაუზიარა ინფორმაცია, თუ როგორ სრულდება ეს სამოქმედო გეგმა, რომლის განხორციელებაც, პრინციპში, დასასრულს უახლოვდება“, − განაცხადა ალექსანდრე ბარამიძემ.

მრგვალი მაგიდის პირველი სესია შესრულებული სამუშაოს განხილვას დაეთმო. სამოქმედო გეგმის ანგარიშები წარადგინეს იუსტიციის სახლმა; სახელმწიფო სერვისების განვითარების სააგენტომ; მონაცემთა გაცვლის სააგენტომ; შრომის, ჯანმრთელობისა და სოციალური დაცვის სამინისტრომ; სახელმწიფო აუდიტის სამსახურმა; საჯარო სამსახურის ბიურომ; კონკურენციისა და შესყიდვების სააგენტომ; საქართველოს მთავარმა პროკურატურამ; შს სამინისტრომ, საქართველოს საკანონმდებლო მაცნემ.

მეორე სესიაზე იუსტიციის სამინისტროს ანალიტიკურმა დეპარტამენტმა „ღია მმართველობის პარტნიორობის“ განახლებული სამოქმედო გეგმა წარადგინა. ინფორმაციის თავისუფლების განვითარების ინსტიტუტის (IDFI) წარმომადგენელმა, გიორგი კლდიაშვილმა შეხვედრის მონაწილეებს საკუთარი წინადადებები და მოსაზრებები გააცნო. ღონისძიების ბოლოს დისკუსია გაიმართა.

„ღია მმართველობის პარტნიორობის“ მიზანია, სახელმწიფო მმართველობაში უზრუნველყოს საზოგადოების მეტი ჩართულობა, მთავრობის მუშაობა უფრო ღია და გამჭვირვალე გახადოს და ტრადიციად აქციოს ხელისუფლების წარმომადგენლების ანგარიშვალდებულება საკუთარი მოქალაქეებისადმი.