"ღია მმართველობა პარტნიორობის“ ეროვნულ სამოქმედო გეგმით, ოზურგეთის მუნიციპალიტეტის საკრებულოს მიერ აღებული ვალდებულებების შესრულების ანგარიშსა და სამომავლო გეგმების შესახებ, საკრებულოს ბიუროს პრეზენტაცია აპარატის უფროსმა ნანა თავდუმაძემ წარუდგინა.

საზოგადოებისთვის კარგად არის ცნობილი, რომ ოზურგეთის მუნიციპალიტეტი „ღია მმართველობა პარტნიორობის" სამოქმედო გეგმას შეუერთდა და ხუთი ადგილობრივი თვითმმართველი ერთეულიდან ერთ-ერთია, რომელმაც გამჭვირვალობისა და საჯარო ჩართულობის უზრუნველყოფის მიზნით ნაკისრი ვალდებულებების შესრულებაზე პასუხისმგებლობა აიღო. სწორედ, შესრულებული ვალდებულებები აისახა OGP-ის 2017 წლის შედეგებში.

«ოზურგეთის მუნიციპალიტეტის საკრებულომ სამოქმედო გეგმით გაწერილი N23 ვალდებულება, რომელიც საკრებულოს სხდომებისა და ანგარიშების პროცესის გამჭვირვალობას მოიცავს, სრულად შეასრულა. ამის წინაპირობა სამოქალაქო საზოგადოების ორგანიზაციებთან, მათ შორის: ოზურგეთის ახალგაზრდა მეცნიერთა კლუბი გურიის ახალგაზრდული რესურსცენტრთან თანამშრომლობით განხორციელებულმა პროექტებმა შექმნა. თუმცა წინ ახალი გამოწვევებია. საქართველოს მთავრობა, როგორც OGP -ის წამყვან თანათავმჯდომარის სტატუსში, მეტი გარდამავალი რეფორმის განხორციელებას გეგმავს. ოზურგეთის მუნიციპალიტეტის საკრებულოს წინაშეც ახალი ვალდებულებები ჩნდება. მათ შორის არის ელექტრონულ პეტიციების, ელექტრონული გზამკვლევის დანერგვა, საზოგადოებრივი ჩართულობის ცენტრების უფრო ქმედითი ფუნქციონირება. ჩვენ პარტნიორ ორგანიზაციებთან ერთად აქტიურად ვმუშაობთ ამ მიმართულებით და ვიმედოვნებთ, მალე საკრებულო ახალ ნოვაციებს დანერგავს „ - აღნიშნა ნანა თავდუმაძემ.

მანვე ბიუროს წევრებს 2018 წლის 17-19 ივლისს, თბილისში დაგეგმილი გლობალური სამიტის შესახებ მიაწოდა ინფორმაცია, სადაც მონაწილეობას ოზურგეთის მუნიციპალიტეტის საკრებულოც მიიღებს.

2017 წლის 19 სექტემბერს გიორგი კვირიკაშვილს საფრანგეთის პრეზიდენტმა ემანუელ მაკრონმა „ღია მმართველობის პარტნიორობის“ (OGP) თავმჯდომარე ქვეყნის სტატუსი ერთი წლით გადააბარა. საქართველო OGP-ის ისტორიაში პირველად გახდა 75 ქვეყნისგან შემდგარი ორგანიზაციის (ინიციატივის) თავმჯდომარე. ის ამ ფუნქციას ერთი წლის განმავლობაში შეასრულებს.